Erabiltzailearen profila

Itzalak Kaz Madhanen Sara-Li - Jatorria sagaren bosgarren liburua da. Komeni da ordenan irakurtzea, ezer ez galtzeko eta ondo ulertzeko. Abisu garrantzitsua: erreseina honetan aurreko liburuen destripea dago!

Narrazioaren hasieran Sara-Lik laugarren liburuaren amaierako sorpresa gogorarazten digu: ahizpa biologiko bat dauka! Bera baino zaharragoa da eta Xia Wei du izena eta, dirudienez, bere bila dabil. Jakina, Sara-Lik ere berarekin elkartu nahi du, baina ez da erraza izaten ari. Beti bezala, lagunen laguntza dauka. Elkarrekin hainbat irteera egiten dituzte eta Avalon jauregiaren inguruko tokiak bisitatzen dituzte, hala nola Ghillie Dhu basoa, Haritz Handia edo Kaz Madhanen hondakinak. Txangoetan ez dira falta abentura, magia eta fantasia. Adiskidetasunak eta talde-lanak, non bakoitzak bere ahalmenen eta gaitasunen onena ematen duen, zenbait zalantza argituko dute, baina misterio berriak ere aurkituko dituzte.

Bitartean, Sara-Lik bere botereak ezagutzen jarraitzen du, eta oraindik ez da horien handitasunaz jabetzen (ezta gu ere). Zorionez, Aurorak haiek ulertzen eta kontrolatzen laguntzen dio.

Itzalak Kaz Madhanen irakurketa interesgarria eta entretenigarria da, ez bakarrik abenturagatik eta magiagatik, baita Sara-Lik bere lagun eta gelakideekin duen harremanagatik ere. Haien arteko erlazioak adiskidetasun politaz gain, inbidiak eta jeloskortasuna ere erakusten du. Egoera dibertigarriak eta problematikoak izaten dira. Azken finean, edozein haur edo gazte koadrilatan bezala.

Testuarekin batera, beti bezala, Patriciaren ilustrazio bikainak daude. Orain arte komentatu ez dudala uste dut, baina hasieran beti dago Avalongo mapa irudikatzen duen ilustrazioa. Bertan, jauregia (non ikasten duten) eta bisitatzen ari diren kokalekuak agertzen dira.

Aipatu behar dut pertsonaia berriak agertzen direla, eskolarekin zerikusia dutenak, istorioaren hurrengo fasean garrantzitsuak izango diren itxura dutenak. Badago bat ziur dakidana horrela izango dela, seigarren liburua argitaratuta dagoelako eta aurrerapenak ikusi ditudalako (ez da nik ere ikuspegiak dauzkadala eta magia egin dezakedala).

Xarpa Books argitaletxearen webgunean (www.xarpabooks.com) Itzalak Kaz Madhanen eta gainerako bildumari buruzko informazio gehiago dago, baita salmentaren estekak ere, bai paperezko ediziorako bai digitalerako ere, gaztelaniaz zein euskaraz. Paperezkoa gomendatzen dizuet, edizioaz eta ilustrazio zoragarriez bete-betean gozatzen delako.

Gerra dela eta, amak seme bikiak amonarekin uzten ditu, beraientzat leku seguruago izango delakoan. Umeek hamar urte baino gutxiago dauzkate, ordurarte ez zuten amona ezagutzen, eta honek ez ditu bilobak estiman.

Oso garai gogorrak hasten dira anaientzat, eta modu autodidaktikoan egokitzeko erabakia hartzen dute, bizirauteko. Haien bizipenak koaderno handi batean idazten dituzte; Koaderno Handian, hain zuzen ere.

Gerraren miseriak adierazi zaizkigu liburu honetan, inozentea izateari uzten dioten umeen begiradaren bidez. Umeak eta inozentzia naturalki lotuta dauden terminoak dira; banantzen direnean beti izaten da gizakiaren ekintzarik txarrenen eraginagatik eta horrek benetan tristura, amorrua, haserrea sortzen ditu. Ume horiek, liburu honetako protagonistak eta gerra bat bizi diren guztiak, biziraunez gero, hurrengo belaunaldiaren umeak hezituko dituztenak izango dira; nolabait, haien zauriak ere transmitituz. Gerra baten ondorioek hainbat belaunaldi kutsatu egiten ditu.

Liburu honek narratzaile bitxia du, pluraleko lehen pertsona baita: «gu». Prosa errazean idatzita dago, umeen hizkera estiloan, eta kapituluak motzak dira. Horregatik, irakurketa erosoa eta arina da, baina gaia, mamia, oso gogor egiten da.

Liburuan ez dira izen propioak erabiltzen. Esate baterako, amonak umeei txakurkume deitzen die. Agotak gerrak sortzen duen deshumanizazioa islatzeko modu bat izan daitekeela pentsatzen dut. Halaber, lekuen izenak ere ez dira aipatzen, ezta datarik ez. Agian idazleak, nahiz eta bere esperientzia erabili idazteko, bikien bizitakoa edozein gerrarako balio duela erakutsi nahi du.

Koaderno Handia 1986 urtean argitaratu zen, frantsesez. Arrakasta handia lortu zuen eta hainbat hizkuntzetara itzuli da. Egun ere oso irakurria da eta institutu eta unibertsitate batzuetan kurtsoko irakurketa da. Horrela iritsi zen nigana, alaba zaharraren ikasketei ezker. Eta horrela jarrai dezala espero dut, benetan irakurketa beharrezkoa iruditzen zait eta.

Gezurra iruditu arren, amaitu dugu Sara-Li, jatorria bildumaren laugarren liburua: «Non zaude, Maylin? ». Beti harrituko nau Julio Santosek eta Patricia Pérezek liburuak argitaratzeko duten abiadurak. Eta, gainera, primeran zainduta daude.

«Non zaude, Maylin?» liburua mamitsua da. Oraingoz, behintzat, atzean utzi ditu hiri galdua eta dimentsio-bidaiak, eta Sara-Lik eta Avalon magia-eskolako bere kideek gogotsu espero zuten zerbaitetan zentratu da: makilatxo-magikoak! Azkenik, haiekin entseatzen hasi dira eta, tira, Sara-Lik errazagoa izatea espero zuen. Gure protagonista berezia da, beraz, bere makilatxo-magikoa ezin zen gutxiago izan, eta, ondorioz, kontrolatzeko zailtasun gehiago izango du. Txango entretenigarri bat ere egingo dute, non abentura, arrisku berriren bat, Casandra, Neil eta Archie lagunekin konplizitatea eta Kendra bere «etsaiarekin» rifirraferen bat ez dira faltako. Hori bai, Kendraren anaiarekin, Kilianekin, gero eta harreman hobea edukiko du.

Hori guztia gutxi balitz, Sara-Lik misterio bat ezkutatzen duen liburu bat aurkituko du: bere barruan, marka bitxi bat eta ikuspenak sortzen duen zerbait daude. Liburu horrek, ikastetxeko iraganeko gertaerekin eta gurasoen aitorpen berriekin batera, Sara-Liren iraganeko zati garrantzitsuak azaleratuko ditu. Ikusten duzuenez, misterioa, magia, abentura eta fantasia aurkituko ditugu.

Ohikoa denez, Julio Santosen prosak irakurketa entretenigarria eta egokia sortzen du, 9 urteetatik gorako haurrentzat, eta Patricia Pérezek orrialde osoko egindako ilustrazio koloretsuek istorioari jarraitzeko eta edizioari kalitatea eransteko plus bat dira. Xarpa Books argitaletxearen webgunean «Non dago Maylin?» eta gainerako bildumari buruzko informazio gehiago dago, baita salmentaren estekak ere, bai paperezko ediziorako bai digitalerako ere, gaztelaniaz zein euskaraz. Paperezko edizioa gomendatzen dizuet, edizioaz eta ilustrazio zoragarriez bete-betean gozatzen delako. Eta, Liburu Azokaren batean egileekin bat egitea suertatzen bazaizue, sinatuta eraman ahal izango duzue, eta pixka batean haiekin hitz egin, hori gozamena baita.

«Obsidianazko begia» Sara-Li: jatorria bildumako hirugarren liburua da, Julio Santos idazlearena eta Patricia Pérez ilustratzailearena. Aurreko bi liburuak «Mila urte geroago» eta «Hiru galdua» dira. Irakurri badituzue, Sara-Li, protagonista nagusia, ezagutzen duzue honezkero. Ekialdeko neskatila da, bere guraso eta Txano eta Oscar anaia bikiekin bizi dena. «Obsidianazko begia» liburuan, Sara-Li eta bere lagunak kanpamentuetan ibiltzen dira: natura, txabolak, elkarbizitza, lagunak eta ez hainbeste... azken finean, gaztetxoak dira. Hala ere, zerbaitek ateratzen du Sara-Li handik: galdutako hirira itzultzeko eskatzen diote. Oraingoan haratago doa eta beste bizimodu bat deskubritzen du, bere irudipenekin zerikusia duena. Asko gustatzen zait Juliok sortu duen eta Patriciak irudietan islatu duen azpimundu hori, bai eszenatokietan, bai pertsonaietan. Beste behin, Sara-Lik fantasia, magia eta irudimena dakarzkigu, bere adineko talde baten esperientzia normalekin batera: bekaizkeria eta norberekeria, eta baita jakin-mina, inpultsibitatea eta baldintzarik gabeko adiskidetasuna ere. Eta zer gertatzen da obsidianaren begiarekin?, esango duzue. Argi dago garrantzi handia duela istorio honetan, baina zertanjakiteko, irakurri beharko duzue... Xarpa Books webgunean «Sara-Liri: Obsidianazko begia» buruzko informazio gehiago aurki dezakezue, eta erosketa-estekak hainbat formatutan, euskaraz zein gaztelaniaz. Bukatzeko, kontatuko dizuet dagoeneko salgai dagoela bildumako laugarren liburua: «Non zaude, Maylin?». Banoa azkar irakurtzera!

«Hiri galdua» Sara-Liren bigarren abentura da. Lehenengoa «Mila urte geroago da». Honek protagonistaren Avalon magoen eskolako lagun eta klase-kideak aurkeztu zizkigun. Abentura berrien hasiera ere utzi zigun, eta zalantza asko airean.

Eskolako lurpean aurkitu zuten kobazuloaren historia jarraitzen du. Irakasleak beren kabuz ikertzen aritu dira, eta bertatik galdutako hiri misteriotsu eta urrutiko batera irits daitezkeela jakin dute. Sara-Li eta bere lagunak hiri horretara doaz. Han mundu berri bat aurkituko dute, non ikertzeko gauza pila bat aurkituko dituzten, baina beste baterako utzi beharko dute. Abentura “zikindu” egiten da bi “gaiztoen” erruz: Malakran, oso gaiztoa dena, eta Kendra, hainbestekoa ez dela uste dudana.

Eta hori da konta dezakedana trama gehiegi ez destripatzeko…

Istorio honetan Txano eta Oscarren —Sara-Liren anaien— sagatik ikusten ari garen elementuak aurkituko ditugu: abentura, fantasia, misterioa, adiskidetasuna eta talde-lana. Baina gazteen artean sor daitekeen lehia hori ere hor dago, inbidiaren ondorio izan daitekeena ziurrenik, eta ez da konpontzen «lagunak izan behar duzue, barkamena eskatu eta besarkada bat eman» batekin. Liburu hauen hizkuntza eta testuaren estiloa (nahiz eta Julio Santosen luma argi ezagutu) pertsonaiekin batera heldutu dira. Gauza bera gertatzen da Patricia Pérezen ilustrazio biziekin eta adierazgarriekin. Dena dago egokituta irakurle helduagoentzat, 9 edo 10 urteetatik aurrera. Edizioa oso ederra eta zaindua da.

Esan behar dut oraingo honetan Txano eta Oscar ez direla ia agertu eta, pena ematen duen arren, bikiekin egindako irakurketa asko izan direlako, egokia iruditzen zait. Sara-Li pertsonaia indartsua da eta bere lekua merezi du, bere koadrilarekin batera.

Xarpa Books webgunean «Sara-Liri: Hiru galdua»ri buruzko informazio gehiago aurki dezakezue, eta erosketa-estekak hainbat formatutan, euskaraz zein gaztelaniaz.